تاراز قالاسىنداعى «داڭق» زالى ۇلى وتان سوعىسىنىڭ تاريحىنان سىر شەرتەتىن بىردەن ورىنعا اينالماق. ءقازىردىڭ وزىندە مۇندا 1،5 ميلليون استام مايدان دالاسىندا تۇسىرىلگەن فوتو جانە مايدانگەرلەردىڭ، سوۆەت وداعىنىڭ باتىرلارىنىڭ جەكە زاتتارى، مەدالدارى مەن وردەندەرى قويىلعان. مۇنان بولەك زالدا حالىق قاھارمانى باۋىرجان مومىش ۇلىنىڭ عىلىمي-زەرتتەۋ ورتالىعى دا جابدىقتالعان دەپ جازادى Qamshy.kz اقپارات اگەنتتىگى. 

تاراز قالاسىندا وتكەن جىلى وبلىس اكىمى اسقار مىرزاحمەتوۆتىڭ باستاماسىمەن قولعا الىنعان قۇرىلىستىڭ العاشقى ناتيجەسى رەتىندە «ەرلىك» مەموريالدىق كەشەنى پايدالانۋعا بەرىلگەنى بەلگىلى. سول كەزدە مەموريالدىق كەشەننىڭ اتىن زاتىنا ساي ەتۋ ماقساتىندا مۇندا تاراز قالاسىنىڭ ءار قيىرىندا تۇرعان باۋىرجان موشىش ۇلىنىڭ ەڭسەلى ەسكەرتكىشى مەن «ماڭگىلىك الاۋ» كوشىرىلگەن-دى.

ال اعىمداعى جىلى جەڭىس كۇنى قارساڭىندا مۇندا «داڭق» زالى ەسىگىن ايقارا اشتى. ءسان سالتاناتتى جاراسقان ەكى قاباتتى عيماراتتىڭ اۋماعى 1500 شارشى مەتردى قۇرايدى. ونىڭ العاشقى قاباتىنداعى ۆيترينالاردا جامبىلدىق مايدانگەرلەردىڭ جەكە قۇجاتتارى مەن قارۋلارى، جەكە زاتتارى قويىلعان. سونداي-اق مۇندا مايداننان جازىلعان حاتتاردى، تاراتىلماي قالعان قارا قاعازداردى تابۋعا بولادى. اراسىندا تىل ەڭبەككەرلەرى قولدانعان قۇرال-سايماندار دا جەتىپ جاتىر.

«داڭق» زالىنىڭ ەكىنشى قاباتى ۇلى وتان سوعىسىنىڭ داڭقتى قولباسشى، جۋالى جەرىنەن شىققان قازاقتىڭ ءبىرتۋار پەرزەنتى باۋىرجان مومىش ۇلى اتىنداعى عىلىمي-زەرتتەۋ ورتالىعى ەتىپ جابدىقتالعان. بۇل عىلىمي-زەرتتەۋ ورتالىعى ءقازىردىڭ وزىندە رەسپۋبليكا اۋماعىنداعى بارلىق ارحيۆتەر مەن الىس-جاقىن شەتەلدەردىڭ ارحيۆتەرىندە جاتقان باتىر باۋىرجان مومىش ۇلى جايىنداعى قۇندى قۇجاتتاردى جيناۋمەن اينالىسۋدا. بولاشاقتا بۇل قۇندى دەرەكتەر نەگىزىندە جانە قاھارماننىڭ قالامىنان تۋعان تۋىندىلارىنىڭ 100 تومدىعىن جارىققا شىعارىپ، قالىڭ وقىرمانعا ۇسىنىلماق.

«دانق» زالىندا باۋىرجان مومىش ۇلى اتىنداعى عىلىمي-زەرتتەۋ ورتالىعىنىڭ جابدىقتالۋىن باتىردىڭ كەلىنى، جازۋشى زەينەپ احمەتوۆا ەرەكشە قۋانىشپەن قابىلداعانىن ايتادى.

–اتام مارقۇم«مەن ولگەننەن كەيىن دە تىرىلەردىڭ ىشىندە جۇرەمىن»، دەۋشى ەدى. مىنەكي، بۇگىن اتا ارامىزدا جۇرگەندەي. رۋحى، قاسيەتى، بارلىعى قاسىمىزدا. قازاق: «وتكەندەرىن ەسكەرگەن – وسكەندىكتىڭ بەلگىسى، وتكەندەرىن ۇمىتقان – وشكەندىكتىڭ بەلگىسى» دەيدى. ءوسىپ-ونىپ جاتقان ەلمىز. سوندىقتان حالقىمىزدىڭ ومىرىندەگى ءاربىر ۇلكەن ىستەردى، ەرلىكتەردى جاستارىمىزعا ۇلگى ەتىپ، ۇرپاعىمىزدى سول اتالاردىڭ بيىك رۋحى، قاسيەتتى ءارۋاعىنا لايىق، سولاردان ۇلگى-ونەگە الاتىنداي ەتىپ تاربيەلەۋ – بۇگىنگى كۇننىڭ مىندەتى. مىنا ءىس تە سول ءوسىپ كەلە جاتقان بۋىننىڭ وتكەنىن ۇمىتپاۋ ءۇشىن جاسالىپ جاتقان تىرلىك، – دەپ اعىنان جارىلدى ز.احمەتوۆا.